“ঐহাকসু অতোপ্পা মীওইশিংগুম্না, ঐগী ফমুঙদা মীওইবা অমগুম তুমখুন তানা তুম্লম্মী, অদুবু য়েংউ, পূম্নমক মশেক মঙাল লৈরবা মহাক্কী মালংগী শাহুমশিংনা ঐগী থক্তা হুম্বীরকলম্মী, অমসুং হৌখিবা পুম্নমক্কী জ্ঞান অদু ঐঙোন্দা তাকপীরম্মী। মসিগী পোৎশক অসি ঐঙোন্দগী নত্তে, মসি পুম্নমক কন্থৌরবা অমসুং পূম্নমক খঙলবা মঙোন্দগীনি… মহাক্কী নাথৈবা য়াদ্রবা কৌরকপশিংদুনা ঐগী নাক্তা য়ৌরক্লম্মী, অমসুং মহাক্কী মীয়াম মরক্তা মহাকপু থাগৎনবা ঙাঙহল্লম্মী।”


বাহা‘উ’ল্লাহ

তরামাপলশুবা চহীচাগী ময়াইচল্লকপা মতম অদু মীওইবা খুন্নাইগী পুন্সিদা অনৌবা য়াকাইবগী মতম অমনি। ইউরোপ, লেটিন অমেরিকা, চিনা, ইন্দিয়া অমসুং নোর্ঠ অমেরিকাদা, অমগী মথঙ অমদা লেপ্পা লৈতনা ওৎনৈরিবা রাজনিটি অমসুং খুন্নাইগী লৈঙাকশিংবু লোইশিন্নবা হৌগৎলক্লম্মী। তন্থরুরবা অমসুং মীখাপোল্লুরবা শাংলবা অহিং অমদগী মীওইবা খুন্নাইগী অফ-ফত্তা খঙবা ঙম্বা ৱাখলদু য়াকাইরকপগী মতৌগুম ওইরম্মী।

মফম খুদিংমক্তা অচুম্বা ৱায়েল, মান্নবা অমসুং মীওইবগী চিংলেম্বদা য়ুম্ফম ওইবা খুন্নাইগী অনৌবা মিৎয়েং অমগীদমক খৌরাংবা অমা লৈরকখি। মতিকলৈবা চক অমা নোংঙাল্লকপগী মতমদু নকশিল্লকলে হায়বগী ৱাখল্লোন অদু মতমদুগী কবীশিংগী ৱাহৈশিংদা ফোংদোকলম্মী। রবিন্দ্রনাঠ টেগোরনা অসুম্না ইরম্মী, ‘‘হৌজিক্কী মতম অসিদা লৈরিব লন্নাই মীওই খুদিংমক্না মহাক মশামকপু অমসুং মহাক্কী অকোয়বদা লৈরিবশিং অদুবু, মীওইবা পুম্বগী নুংগী ওইবা পুনশিনবদা মীওইবনা মহাক্কী থৱায়বু খঙজরগদবা, অনৌবা চক অমগী নোংঙাল্লকপা অদুগীদমক্তা মশামকপু শেম-শাজনবা খোল্লাও অদু লাক্লে।’’

অসিগুম্বা মতম অমদা, মালেম অয়াম্বনা খঙদনা, মীওইবা জাতীনা মপুঙফারকপগী মতমদুগী লাইপোক ওইরিবা বাহা‘উ’ল্লাহনা, ইরানদা ঙান্থোরকপগা লোয়ননা তাইবঙ মপুগী অনৌবা পাওজেল অমগী নুমিৎ অদু থোরকলম্মী। বাহা‘উ’ল্লাহনা তাকপীরম্মী মদুদি তাইবঙ মপু অমখক্তা লৈ, মদুদি লাইনিং লম্বী খুদিংমক চপ-মান্নবা তাইবঙ মপুগী লাকপনি অমসুং মখোয়গী য়ুম্ফমওইবা মিৎয়েংদা চুম্মী অমসুং মীওইবা জাতীবু পুনশিন্নবগী মতম অদু লাকলে।

অতোপ্পা মতিকলৈবা লাইনিংলোনশিংবু হৌদোকপীরম্বশিং মালেমদা হিংখিবা পুন্সিবু শক্তাকখিবা থোইদোক হেন্দোকপা গুনশিংদুনা বাহা‘উ’ল্লাহগী পুন্সিসু শকতাকখি। ১৮১৭দা ইরানদা ৱাত্ত-পাদবা, অচৌ অশাং অমগী ইমুঙ অমদা পোক্তুনা, অঙাং ওইরিঙৈদগী হৌনা বাহা‘উ’ল্লাহনা ময়ামগা মান্নদবা লৌশিং উত্থোক্লম্মী অমসুং থৌজাল হৈবা, পুকচেল চাওবা অমসুং অচুম্বা চৎপদা মহাক্কী লম্বা লৈরমদে। মহাক্কী মপাবুঙনা লৈখিদ্রবা মতুংদা নিংথৌগী কোনুংদা অৱাংবা ফম অমা মঙোন্দা পীখি। অদুবু মহাক্না নোল্লুক্না মদুবু লৌখিদে, অদুগী মহু্ত্তা মহাক্কী মতম অদু ওৎনৈবিরবা, নারবা অমসুং লাইরবশিংবু মতেং পাঙবদা কত্থোকচখি।

তরামাপলশুবা চহীচাগী ময়াইচল্লকপা মতমদুদা অনৌবা লাইনিংলোনগী লাইপোক ওইনা বাহা‘উ’ল্লাহনা মহাক্কী পান্দম অদু লাওথোকপা মতমদা, মহাক্কী তম্বীরোলশিংনা হাংদোকপিরিবা অনৌবা মতমগী মিৎয়েং অদু পুমনৌ নৌবা অমনি। মহাক্কী খ্বাইদগী মরুওইবা চৎনপথাপ – মদুদি মীওইবা খুন্নাইগী অমত্তা ওইবদু থবক্তা তশেংনা ওন্থোকপগী মতমদু লাকলে-অদু মশিং য়াম্লবা খুন্নাইগী ওইবা তাকপী তম্বীরোলশিং হায়বদি নুপী অমদি নুপাগী থাক মান্নবা বীজ্ঞান অমদি লাইনিং লম্বীগী চুংশিন্নবা, অচুম্ববু নি্ংতম্না থিজবগী দরকার, পুরোহিৎপু মুত্থৎপা, য়ুম্ফম য়াওদনা লান্না থাজবা পূম্নমক থাদোকচবা, অমসুং মালেমদা লৈরিবা খুদিংমকপু মহৈ মশিং তম্বীবনা তেংবাংশিল্লম্মী।

মহাক্কী তাকপী তম্বীবশিংদুনা মমাংঙৈগী ৱাখল্লোনদা লুপ্লবা পুরোহিৎকী সঙস্থান অমদি রাজনিটিগী ওইবা কুইনা চৎনদুনা মরা তারবা চৎনবীশিংদগী কল্লবা উল্লেনগী মতৌগুম্না মায়োক্তা লৈরকখি। ইরানগী সিয়াশিংগী পুরোহিৎ অমদি মতমদুগী খ্বাইদগী শক্তি লৈরবা লৈঙাকপা অনী ওইরিবা – ইরানগী নিংথৌ অমসুং ওতোমান লৈঙাক-মখোয়না মহাক্কী ইথিল অদুবু মুত্থৎনবা মখোয়গী ঙমজবা শক্তি শিজিন্নদুনা হোৎনখি। বাহা‘উ’ল্লাহগী লনথুম পূম্নমক মৎপিখি, ওৎনৈখি, ফুবিখি, য়োহ্লিং চন্দুনা কৈশুমশঙদা থম্বীখি, অমসুং লৈবাক অমদগী লৈবা্ক অমদা মহাকপু মরিরক লোই থাবীখি অমসুং মমৈথঙদা ওতোমান লৈঙাক্কী দন্দি পীনবগী কৈশুমশঙগী লমদম ওইরিবা Akko দা মহাক ১৮৯২ দা নোঙ্গাখি।

মহাক্কী শৈথাবদা ৱারগদবা অৱাবশিংদু খল্লুদনা, বাহা‘উ’ল্লাহনা মহাক্কী থৌদাং অদু মখা চত্থখি, মীওইবা জাতীবু লমজিং লমতাকপীনবা অশেঙবা অইবশিংগী লাইরিক চাম্মা হেন্না ফোঙলম্মী। মীওইবা জাতীনা য়ৌজবা ঙম্বা থাক ৱাংলবা চিংলেম্বা অদুদা মহাক্না চপচানা থাজখি অমসুং মীওইবা জাতীনা মখোয়গী তশেংবা লাইবক্তু ফঙহনগদবা অহোংবগী মরুশিংদু থাজবদা চৈনা অমত্তনা নত্রগা কত্থোকপা অমত্তনা মহাকপু নিংহন্নরমদে। মহাক্না হিংলিঙৈ মতমদা, মহাক্কী য়েক্নবশিংনা মায়োক্তা লৈরবসু, মহাক্কী মতিক ময়াইদি লেপ্তনা হেনগৎলম্মী।মহাকপু লোই থাখিবা মফম খুদিংমক্তা, মহাক্কী তম্বীরোলশিং অমসুং মহাক্কী নুংশিবা, শক্তি অমসুং মতিক মগুন্না মীওই লিশিং লিশিং চিংশিল্লমখি। ঙসিদি মহাক্কী লাইনিং অসি তুং ইনবা লাখ হুম্ফুমুক লৈদুনা মালেমগী মফম খুদিংমক্তা শন্দোক্তুনা য়ৌখ্রে অমসুং অতোপ্পা মীওই লাখ লাখনা মহাক্কী পুন্সি অমসুং ৱাহৈদগী অপুনবা মালেম অমা শেম্নবা পাঙ্গল অদু লৌজরি।

কেমব্রিদজকী ওরিয়েন্তেলিষ্ট ইদৱার্দ গ্রেনভীল ব্রাউননা বাহা‘উ’ল্লাহ নোঙ্গাখিদ্রিঙৈগী মমাঙদা বাহা‘উ’ল্লাহগা উন্নখি। তুংগী মিরোলগীদমক্তা মহাক্না মসিগী নুংশিরবা পাওদম অসি থম্বীরম্মী: ‘‘ঐহাক্না য়েঙখিবা মহাক্কী মায়খোঙ অদু ঐনা কৈদৌনুঙদা কাওবা ঙম্লোই, মদুবু ঐনা শৈথাবা ঙমদ্রবসু। ফাওনা য়েংবা মিৎয়েংশিংদুনা ঐগী থৱায়মক্তুবু পাবগুম ফাওখি; শক্তি অমদি ওঠোরিটি অদু মরাংকায়রবা পিশুমথক্তা লৈরি… নিংথৌশিংফাওবদা কল্লক্কদবা অমসুং লৈঙাকপশিংনা ইকায়জগদবা, ইরাৎচনবা অমসুং নুঙশিনবগী মীওই অমা ওইরিবা মহাক্কী মমাঙদা ইশামক্না নোল্লুকচনা খুরুমজবদুদা, কনাগী মমাঙদা লেপ্লিবনো হায়না হংলুবগী দরকার তাখিদে!’’

Exploring this topic:

The Life of Bahá’u’lláh

The Early Bahá’í Community

The Shrine of Bahá’u’lláh

Quotations

Articles and Resources