“বাহা‘উ’ল্লাহগী তম্বীরোলশিংগী মনুঙদা অমদি মসিনি মদুদি পোৎচাক্কী ওইবা সভেত্য অসি মীওইবা জাতীগী মালেম অসিগী চাওখৎনবগী পাম্বৈ অমা ওইরবসু, মদুনা তাইবং মপুগী ওইবা সভেত্য অদুগা পুনশিনদ্রিবমৈখদি, পামলিবা মহৈ হায়বদি, মীওইবা জাতীগী নুঙাই য়াইফবা, অদু ফঙবা ঙম্লোই…”


অব্দুল বাহা

বাহা‘উ’ল্লাহনা অনৌবা মালেম অমগীদমক্তা শান্না উবীরম্বা মিৎয়েং অদুনা থৱায় হাপ্লবা মখোয়শিংদুনা, নুংগী অমদি পোৎচাক্কী ওইনা ৱাত্ত পাদবা ওইবা মশাখিংবা খুন্নাইশিং শেমগৎনবা থবক থৌরমশিং অমদি প্রোগ্রামশিং পায়খৎলি। অসিগুম্বা খুন্নাইশিং শেমগৎপা অসি মদুবু শেমগৎকদৌরিবা লন্নাই মীওইশিং, সঙস্থানশিং অমসুং খুন্নাইশিংদুগী তৌবা ঙম্বা অমসুং মপুঙফাবা অদু অঙকপা ফঙনা হেনগৎলকপা মথৌ তাগনি। হৌজি্ক, ইন্দিয়া শিন্থুংবদা লৈরিবা বাহা’ই খুন্নাইশিংদা, অসিগুম্বা তৌবা ঙম্বসি লাই-খুরুম্বা অমসুং সেবাগা মরিলৈনবা থবক থৌরমশিং অমদি প্রোগ্রামশিংগী মতেংদগী য়োকখৎলি।

বাহা’ই তম্বীরোলশিংদগী নুংহুৎনা উবা জ্ঞানশিং অতোপ্পদা শরুক তমদুনা, পুন্না লাইখুরুম্মিন্নবগী মফমশিং শেমদুনা, নহাশিংবু শক্তি হাপ্পীদুনা, অমসুং মরুপশিংবু তাইবং মপুগী ৱাহৈবু নৈনবদা মতেং পাঙবীদুনা অমসুং মদুবু তাইবংপানগী নুঙাই য়াইফনবগীদমক্তা শিজিন্নদুনা, শরুক য়ারিবশিংদুনা লাইখুরুম্বগী থবকশিং অমদি মীয়াম পুম্বগী অফববু য়োকখৎনবগী হোৎনবশিংগী থবকশিংদু পুন্না পুনশিল্লকই।