মালেমশিনথুংবদা, সহরশিং, খুঙ্গংশিং অমসুং টাউনশিংদা, বাহা’ই কয়া কয়ানা নুংগী অমদি পোৎচাক্কী ওইনা ৱাত্ত-পাদবা খুন্নাইশিং শেমগৎনবা কন্না হোৎনরি। হেন্না ফবা মালেম অমা শেমগৎনবা ইখৌলাংজবা মখোয়শিংগা খুৎশম্ননা, মখোয়গী লাই খুরুম্বা অমসুং সেবাদা মিৎয়েং থম্বা থবক থৌরমশিং অমদি প্রোগ্রামশিংগী মতেংদগী অনৌবা সভেত্য অমগী য়ুম্ফমশিং থোন্নবা লেপ্পা লৈতনা হোৎনরি। মালেমগী খ্বাইদগী নৌরিবা লাইনিং লম্বী ওইরিবা বাহা’ইগী লাইনিং অসিগী তুং ইনবশিংগীদি মসিগী হোৎনবশিংসি মীওইবা খুন্নাইগী নুংগী অমদি পোৎচাক্কী ওইনা পুন্সিন্নবগী খ্বাইদগী মপুঙওইবা পান্দমগীদমক্তা পায়খৎপা পাকচাওখ্রবা মালেমগী ওইবা হোৎনবশিংগী শরুক অমনি।

ইন্দিয়াদা লৈরিবা বাহা’ইশিংসি হৌরকফম খূদিংমক্তগী লাকই-অন্দামানগী উমংশিংদগী হৌদুনা মুম্বাইগী ৱাংলবা য়ুম্ফমশিংফাওবদগীসু য়াওরক্লি, টামিল নাদুগী সমুদ্রা তোর্বানদগী হৌদুনা চিঙজাওশিংনা লাঙ্গোই চল্লিবা সিক্কিমদগীসু য়াওরি। মখোয়গী য়ুমশিংবু পুন্না লাইশোল হায়মীন্ননবা, অঙাংশিং, নৌরিবা নহাশিং অমসুং অহলশিংগী নুংগী ওইবা মহৈ মশিংগী ক্লাসশিংগীদমক পুনফম অমা ওইনা হাংদোক্তুনা, অপুনবা, অচুম্বা ৱায়েল অমসুং মীয়ামগী অফবদা কত্থোকচবা গুনশিংসিনা শক্তাকপা খুন্নাইগী পুন্সিগী পরিং অমা শেমগৎনবা খেন্ন-খেন্নবা ফিভমশিংদা লৈরিবা মখোয়গী খুন্নাইশিংগী মীয়ামশিংদুগা পুন্না থবক পায়খৎমিন্নরি।

পাকচাওখ্রবা, লিরবা মতমদগী লৈরক্লবা অমসুং মখল মথেল কয়াদা খেন্নবা মওংদা লৈরিবা ইন্দিয়াগী লৈবাক অসি কুনমাথোইশুবা চহিচাদা মতিকলৈনা চঙশিল্লকপগা লোয়ননা, মখোয়গী মমাঙদা অনৌবা ঙমখৈশিং হাঙদোরক্লি। মসিগী তুংদা লাক্কদবা মতম অসিনা পুরক্লিবা খুদোংচাবশিং অমদি থেঙনগদৌরিবা অরুবা থবকশিংদুনা লন্নাই মীওইশিং, সঙস্থানশিং অমসুং খুন্নাইশিংদুবু হেন্না লুবা হেনজিল্লক্লবা, মতিকচানা অমগা অমগা শম্নরবা মালেম অমদা মরাংকাইনা চাওখৎপা ঙম্নবা নুঙগী ওইবা মপুঙফাবা অমসুং ৱাখল লৌশিংগী তৌবা ঙম্বগী অনৌবা থাকশিং মথৌ তারক্কনি।

লৈবাক অসিগী মীয়ামবু অচুম্বা ৱায়েল অমসুং অমত্তা ওইবদা য়ুম্ফম ওইবা মালেম অমা শেমগৎপদা দরকার ওইবা নুংগী ওইবা নুংহুনজিনবা লৌশিং অমদি বিজ্ঞ্যানীক ওইবা মিৎয়েংশিংদুবু পিবীগদবা তৌবা ঙম্বা শেমগৎপগী অমদি তমশিনবগী লেপ্পা লৈতবা হোৎনবা অদুদা ইন্দয়াদা লৈরিবা বাহা’ই খুন্নাইনা থৱায় হকচাং য়াওনা কত্থোকচরি।