“নহা ওইরিঙৈগী মতমসি পাঙ্গল অমসুং থৱায় য়াওবনা শক্তাকই অমসুং মীওইবগী পুন্সিদা খ্বাইদগী ফবা মতম ওইনা তোপ তোপ্না লৈ। মরমদুনা নখোয়না অহিং নুংথিল লেপ্তনা কন্না হোৎনগদবনি, মদুদি লাইরমলেনগী ওইবা পাঙ্গল পীনবিরদুনা, লঙলবা পুক্নিংগী তৌনিংবশিংনা (brilliant motives) থৱায় হাপ্লদুনা অমসুং মহাক্কী নোংমদোনথক্কী শক্তি অমদি লাইরমলেনগী মীনুংশি থৌজাল অমসুং শোইদ্রে খঙহনবীরকপদুনা মতেং পাংবীরক্নবা…”



অব্দুল বাহা

বাহা’ই খুন্নাইনা নহা ওইরিঙৈ মতম অসি মীওইবা অমগী পুন্সিগী য়াম্না অখন্নবা তাঙ্কক অমনি হায়না লৌই, মসি অখন্ননা মীওইবগী য়েনিংথাগী মতমনি হায়না শকখঙই। নহাশিংগী লেপ্তনা হেনগৎলক্লিবা ৱাখল লৌশিং, নুংগী ওইবা শক্তি অমসুং হকচাংগী ওইবা তৌবা ঙম্বশিংসি মসিগী মতম অসিদা খুন্নাইবু হোংহন্নবা শিজিন্নরবদি, খুন্নাইশিং অমদি নহা অনিমক্না মখোয়গী লোত্তুনা লৈরিবা অশেঙবা শক্তি অদুবু ফঙজবা ঙমগনি। নৌরিবা নহাশিংগী চহী অসিগী মতাংদ অখন্নবা শেমশাবা অমা মথৌ তাই, মতম অসি য়াম্না থুনা হোংবা চহী ১১দগী ১৪ফাওবগী চহীগী মনুঙদনি, মতমসিদা নহা ওইরিবা মীওইশিংনা অঙাং ওইবগী মতমদু থাদোক্লমলগা মপুঙ মরৈ ফাবদু তম্না চঙশিল্লিবনি। ‘নৌরিবা নহাশিং’ হায়না খঙনরিবা মসিগী ইনখৎলক্লিবা নহাশিংসি মখোয়গী পুন্সিগী মসিগী তাঙ্কক অসিদা ৱাহং কয়া অমা অমসুং নিংজবা কয়া অমা লৈজৈ। অয়াম্বা মতমদা মসিগী চহী তাঙ্কক অসি অৱাবা কাঙলুপ অমা ওইনা ফত্তবা মওংদা উহল্লবসু, নৌরিবা নহাশিংগী কাঙলুপকী থৌরম অসি মসিগী চহী কাঙলুপসিনা অফবা তৌনিংবগী, তেংপানগী মতাংদা খঙনিংবা, অচুম্বা ৱায়েলগী অকনবা ইথিল লৈজবা অমসুং মালেমগী য়াইফনবগীদমক্তা থবক শুনবগী অকনবা অপাম্বা লৈজবা ৱাখল্লোনদা য়ুম্ফম ওইদুনা শেমখিবনি। মসিগী কাঙলুপ অসিবু শিংনবা অমসুং ওইথোকপা য়াবনা থল্লবা মসিগী মতম অসিবু ফাওদুনা চৎখিবদা মখোয়গী মতেং পাংনবা, নৌরিবা নহাশিংবু নুংগী ওইনা শক্তি হাপ্পীনবগী প্রোগ্রাম অমা মালেমশিনথুংবদা বাহা’ই খুন্নাইনা পায়খৎলি।

মসিগী প্রোগ্রাম অসিগী শরুক অমা ওইনা, চহী ১৫ শুরবা অমদি মসিদগী হেনবা নহাশিংবু ‘এনিমেটরস’ ওইনা সেবা তৌনবা ট্রেনিং তৌবী। এনিমেটরশিং অসিনা মখোয় মখোয়গী লৈকাইশিংদা নৌরিবা নহাশিংগী অপিকপা কাঙলুপশিংবু লোইনবী। মখোয়গী এনিমেটরগী মতেংগা লোয়ননা, মসিগী নৌরিবা নহাশিংসিনা মখোয়গী ৱাখলদা লৈরিবা অরুবা ৱাহংশিংদু কুপ্না খন্না নৈনৈ। মখোয়গী নুংগী ওইবা উবা ঙম্বা অমদি ৱারেপ লৌনবগী লমচৎ শাজৎকী চৎন-কাঙলোন (ফ্রেমৱার্ক) শেমগৎপদা মখোয়বু মখোয়বু মতেং পাংবীবা লাইরিকশিং মখোয়না নৈনৈ। লাইরিকশিং অদুনা মখোয়গী ফোঙদোকপা ঙম্বগী শক্তি অদুবু অফবা মওং অমদা শিজিন্নহনবদা মতেং পাংবী, অমসুং মখোয়গী মরাংকাইবা পাঙ্গল শক্তিশিংদুবু মখোয়গী খুন্নাইশিংগী সেবা তৌবদা ওনশিলহল্লি। প্রোগ্রাম অদুনা চঙশিল্লিবা তশেংববু থিজিনবদুনা সমাজতা লৈরিবা শেমগৎ শাগৎপগী অমসুং কিন্থা কাইথবগী শাফুশিংদুবু কুপ্না নৈনবদা মখোয়গী মতেং পাংবী। মদুনা চিংলেম্লবা মীওইবশিং ওইরিবা মখোয়গী অশেঙবা শক্তম অদুবু মখোয়দগী লৌবিখিগদবা শাফুশিংদু থেংনবা ঙমহল্লি, অদুগা মখোয় মশামকপু অফবা অহোংবা পুরক্নবগী হোৎনবশিংদুগা চুননা হোৎনথোকহল্লি।মখোয়গী অহাংবা মতমদা এনিমেটরস ওইনা সেবা তৌনবা ভোলুনটিয়ার তৌরকপা নহা লিশিং কয়াগী মতেংদগী অসিগুম্বা কাঙলুপশিংদা ইন্দিয়াদা লৈরিবা নৌরিবা নহা লিশিং লিশিংনা শরুক য়ারি।