The Bahá'í Faith

આખા વિશ્વના શહેરો, નગરો અને ગામોમાં લાખો બહાઈઓ એવા સમુદાયોનું નિર્માણ કરવાનો પ્રયત્ન કરી રહ્યા છે જે આધ્યાત્મિક અને ભૌતિક રીતે સમૃદ્ધ હોય. એવા બધા લોકો જેઓ એક બહેતર વિશ્વ ઝંખે છે તેમની સાથે હાથ મિલાવીને, તેઓ ઉપાસના અને સેવા ઉપર કેન્દ્રિત પ્રવૃત્તિઓ અને કાર્યક્રમો દ્વારા એક નૂતન માનવ-સંસ્કૃતિના પાયાની સ્થાપના કરવા માટે પરિશ્રમ કરી રહ્યા છે. બહાઈ ધર્મ, જે વિશ્વનો સૌથી નવીન ધર્મ છે તેના અનુયાયીઓ માટે, આ પ્રયત્નો એક એવા મહાવિશાળ વિશ્વવ્યાપી પરિક્રમનો ભાગ છે જેનું ધ્યેય છે માનવજાતિની આધ્યાત્મિક અને ભૌતિક એકતા.

ભારતમાં, બહાઈઓ દરેક પૃષ્ઠભૂમિમાંથી આવે છે – આંદામાનના જંગલોથી મુંબઈની ઊંચી ઈમારતોમાંથી, તામિળનાડુના દરિયા કિનારાઓથી સિક્કિમના પર્વતીય વિસ્તારોમાંથી. તેઓ સામુહિક પ્રાર્થના સભાઓ માટે, તેમ જ બાળકો, કિશોરો અને વયસ્કો માટે આયોજિત આધ્યાત્મિક શિક્ષણના વર્ગો માટે તેમના ઘર ખુલ્લા કરીને, વિભિન્ન પ્રકારની વ્યવસ્થામાં તેમના સમુદાયના નિવાસીઓ સાથે સહયોગ કરીને, એક એવા સામુદાયિક જીવનની ભાત ગૂંથી રહ્યા છે જેની લાક્ષણિકતાઓ છે એકતા, ન્યાય અને સર્વસામાન્ય હિત માટે નિષ્ઠા.

જેમ આ વિશાળ, પ્રાચીન અને વૈવિધ્યપૂર્ણ રાષ્ટ્ર એકવીસમી સદીમાં ભવ્યતાપૂર્વક આગળ વધી રહ્યો છે ત્યારે, તેની સમક્ષ નવી ક્ષિતિજો ખૂલી રહી છે. આ ભવિષ્ય તેની સાથે જે તકો અને પડકારો લાવશે તેને ઝીલવા માટે આવશ્યક છે કે વ્યક્તિઓ, સંસ્થાઓ અને સમુદાયો આધ્યાત્મિક પરિપક્વતા તથા બૌદ્ધિક ક્ષમતાઓના નવા સ્તરો પ્રાપ્ત કરે, કે જેથી તે આ જટિલ તેમ જ આંતરસંબધિત વિશ્વમાં સફળતા પ્રાપ્ત કરી શકે.

ભારતનો બહાઈ સમુદાય ક્ષમતા નિર્માણ અને શીખવાની એવી પ્રક્રિયાઓ પ્રત્યે કટિબધ્ધ છે જે મોટી સંખ્યામાં દેશના લોકોને ન્યાય અને એકતાના પાયા પર સ્થાપિત વિશ્વનું નિર્માણ કરવા માટે જરૂરી આધ્યાત્મિક અંતર્દ્રષ્ટિઓ તેમ જ વૈજ્ઞાનિક દ્રષ્ટિકોણથી સુસજ્જિત કરશે.